BRETTAFERÐIN ÓGURLEGA

Ég hef ákveðið að reyna að blogga oftar en einu sinni á ári. Eftir að Facebook leit dagsins ljós hefur bloggum fækkað. Mér finnst það synd, þar sem maður getur ekki lesið eins frásagnir á facebook eins og á bloggum. Ég veit um fólk sem ekki er á facebook og sakna þess að geta lesið sögur og frásagnir frá fólki. Því ætla ég að setja inn hérna sanna sögu sem gerðist fyrir tæpu ári. Þessi saga er sett inn fyrir æsta aðdáendur mína, sem segjast sakna þess að ég bloggi.....hehe.

Gjörið svo vel!!


Þessi lífsreynsla var skrifuð 29. september 2009.

Sá tími dagsins var kominn að ég skyldi á brettið til að ná hægt og sígandi af mér skvabbi sem laumast hefur að mér síðustu 29 árin. Þegar ég fer á brettið er alveg bráðnauðsynlegt að hafa tónlist eða sjónvarpsefni svo þetta gangi hratt og örugglega fyrir sig. Þess vegna datt mér í hug að nota mp3 spilarann minn og góðu headphone-in. Það kemur eflaust verulega á óvart að ég nennti ekki að hlusta á Benedikt búálf undir þessum kringumstæðum og var því búin að safna saman taktföstum og skemmtilegum lögum í tölvunni. Setti ég þau inn á mp3 spilarann, fór í stuttbuxurnar sem ég kem kannski til með að passa í eftir X margar brettaferðir, skóna mína nýju og fínu og nánast ónotuðu og að sjálfsögðu eitthvað sem heldur ÞÚVEISTHVERJUM á sínum staða á meðan á þessu stendur. Hoppa með þvílíkum tilþrifum á brettið, sting því í samband, kveiki á því og sting svo öryggislyklinum á sinn stað og þá varð allt svart. Já flott, það sló út. Jæja, best að redda því í flýti og byrja upp á nýtt. Var ég komin á brettið náði að koma því í gang án þess að slá út öllu rafmagni og þá var ekkert annað í stöðunni en að byrja. Mig var bara farið að hlakka til að arka á brettinu og hlusta á tónlistina sem ég var búin að velja. En nei, þegar ég kveikti á mp3 spilaranum var hann kominn í verkfall. Dauði og djöfulll....hugsaði ég með mér, það er ekki séns í baun að ég fari á brettið í dauðaþögn, þá drepst ég úr leiðindum. Ég reyndi hvað ég gat að koma hel.... spilaranum í gang, aftur og aftur tók ég batteríið úr og setti aftur í, kveikti, slökkti, kveikti en EKKERT. Jæja, best að nota þá bara tölvukvikindið sem er nánast við hliðina á brettinu. Ég gæti líklegast tengt head phone-in í hana og valið tónlistina beint þaðan. Þannig að ég þurfti að fara AF brettinu, finnna þessa tónlist aftur og setja hana í playlist svo ég þyrfti nú ekki að velja lag í hvert skipti sem það síðasta kláraðist. Jæja, ég svifti mér aftur á brettið en þá var það AUÐVITAÐ búið að slökkva á sér af því að það var ekkert að gerast á því í meira en 5 mínútur. Þannig að ég kveiki aftur og hvað gerist????? ALLT SVART, og þar með tölvan og lögin sem ég var búin að undirbúa svona fallega fyrir þessa brettaferð. Það tekur ekki nema mjög margar mínútur að kveikja á tölvunni þar sem hún er á einhverskonar breytingarskeiði og gerir nánast aldrei neitt af því sem maður biður hana um. Jæja, tölvan komin í gang, best að finna EINU SINNI ENN til þessi lög og setja í playlist. Þarna var ég alvarlega farin að hugsa um það hvort ég ætti nokkuð að vera að fara á brettið, þetta væri örugglega eitthvað sign um að ég ætti ekki að fara....hehe. En allavega, ég náði aftur að setja brettið í gang án þess að slá öllu út og byrja að arka eins og enginn sé morgundagurinn!! Eftir u.þ.b. einnar mínútu ark fer ég að finna til í löppinni og finnst eins og það sé eitthvað í skónum mínum á hægri fæti. Ég stekk af brettinu, úr skónum og fer að ath málið. Framleiðslugalla myndi ég kalla þetta en þarna stóð einhver hnútur út úr skónum sem meiddi mig. Ég reif hann úr með mínum fullkomnu nöglum og skellti mér aftur í skóinn.. Allt miklu betra núna, var hætt að finna fyrir þessu. En eftir u.þ.b. eina mínútu fór ég að finna til í hinum fætinum, eins og það væri eitthvað í skónum þar. Púff...ég svifti mér af brettinu með stæl, úr skónum og hellti allskonar rusli úr honum Henti mér í hann aftur og á brettið. JÆJA, núna get ég nú aldeilis tekið á því. Eftir laaaaaaangan tíma, eða um það bil 20 mínútur, þá fannst mér nú eitthvað minna vera að gerast samkvæmt púlsmælinum í brettinu en hann fór aldrei yfir 110. Þó ég viti nú ekki mikið um púls og þjálfunarpúls og allt það, þá veit ég samt að hann á að vera hærri en þetta, þannig að ég fer að hlaupa svona hálfvegis.... þið vitið, ekki hlaupa en ekki labba heldur. Svona mitt á milli bara. Já nú kom þetta, púlsinn svoleiðis rauk upp og ég fagnaði því með því að herða aðeins á brettinu, alveg frá 6 km hraða upp í 6,7..hehe. Þar sem ég er nú ekki í besta forminu var þetta of mikið fyrir mig þegar það fór að líða á þannig að ég ákvað að hægja á mér aftur og fara að labba eins og áður. En nei, þegar ég hægði á mér voru lappirnar eitthvað óánægðar með það og ég fékk geðveika verki þegar ég hætti að hlaupa og fór að labba. Þannig að ég prufaði að herða örlítið á aftur og þá fóru verkirnir!! Sem segir okkur það að ég VARÐ að „hlaupa“ það sem eftir var svo ég dræpist ekki úr verkjum í fótunum. Spikið hentist til og frá og veggirnir voru orðnir votir af svita, komin móða í gluggana og hitinn í herberginu kominn hátt í 40 gráður. En lögin héldu mér við efnið og þessar blessuðu 40 mínútur voru loksins liðnar og eins 4,5 km sem ég fór. Ég dröslaðist af brettinu, rennandiblaut af svita, hlammaði mér í stólinn fyrir framan tölvuna og slökkti á tónlistinni. Akkurat þá komu Hafdís og Berghildur inn í herbergið, kvörtuðu undan mjög miklum hita þar inni, rifu sig úr fötum og vældu um að fá að fara á brettið. Okei, þær máttu fara á brettið í smá stund. Þær urðu yfir sig glaðar og hlupu á brettið, ég setti það í gang fyrir þær og hlammaði mér aftur í stólinn. Þarna voru þær, við hliðina á mér, hlægjandi og skríkjandi á brettinu af því að þetta var svo GAMAN, á meðan ég sat eins og klessa í skrifborðsstólnum og reyndi hvað ég gat að ná andanum eftir þessa æðislegu, geðveikt skemmtilegu og alls ekki pirrandi ferð á brettið. Já þær vita sko ekki hvað framtíðin ber í skauti sér þessar ungu dömur..... En boðskapur þessarar sögu er BEAUTY IS PAIN!!!!!!!!!!!!!!!!!!!!!!!!!

SUMARBLOGG

Haldiði að ég hafi ekki bara verið í fríi þessa helgi og hún var skemmtileg, ein skemmtilegasta helgi sem ég hef upplifað núna á síðari árum!! Við Guðrún mágkona ákváðum að skella okkur í road tripp og störtuðum henni hér á Laugarbakka kl fjórtán núll núll laugardaginn 8. ágúst 2009. Fórum fyrst í Löngufit til að láta múttu gömlu vita að við værum að fara. Svo komum við við í Grettisbóli á Grettishátíðinni. Þar var múgur og margmenni og Guðrún náði að slasa sig á tré!!! Skagaströnd var næsti áfangastaður og vorum við komnar þangað um hálf fjégur sama dag..hehe. Þar vorum við til að leita að húsi Fritz Hendrik Berndsen, langalangafa mínum og við vorum búnar að sjá fyrir okkur stórt og myndarlegt eldgamalt hús upp í klett.....en nei, þegar við fundum það loksins þá var þetta minnsta húsið á staðnum, eða lítið timburhús samansett af þremur herbergjum. Eldhús, stofa og svefnherbergi. En fallegt var það nú samt. Áður en við fórum inn í þetta fagra hús sem opnaði klukkan fjégur, þá fórum við á kaffihús sem ég man ekki alveg hvað heitir en það var mjög fallegt og kósí. Tónlistin þar inni lét manni líða eins og maður væri þarna inni fyrir svona 50 árum eða svo. Við keyptum okkur kaffi og dýrindis gulrótarköku. Settumst út í mjög gott veður og nutum lífsins. Við fórum á klósettið á þessu ágæta kaffihúsi, sem er svosem ekki í frásögur færandi, en þar inni var skondin og skemmtileg vísa, sem ég lagði á minnið og ætla að fara með hér:

Þessi vísa var semsagt staðsett fyrir ofan klósettið svo að karlmaðurinn sæi hana þegar hann stendur og pissar!!!!:

Keyta á gólfi, hún vanda oss veldur
því vont er hrygginn að beygja
Stattu nær-hann er styttri en þú heldur
og stubbinn reyndur að teygja.


Greinilega vandamál með piss á gólfi þarna á þessu kaffihúsi!!!! Allavega, þegar inn í langalangafa húsið kom rákumst við á spákonu sem spáði fyrir okkur báðum. Hún lagði spil á borðið og sagði okkur ýmislegt skemmtilegt, sem ég ætla ekkert að fara að hafa eftir hérna á veraldarvefnum. Að þessu loknu fórum við í Kántrýbæ til að rifja upp gamla daga, eða þ.e.a.s. verlsunarmannahelgina 2002 þegar ég datt í drullupollinn góða og fór í fýlu. Því næst fórum við á Blönduós, rúntuðum þar einn „hring“ og fórum svo heim á leið. Þegar við fórum að nálgast Vatnsdalinn glopraði ég því út úr mér að ég hefði aldrei keyrt þar inn. Guðrún tók 90 gráðu beygju á 90 km hraða inn Vatnsdalinn austan megin og sagði, Jæja Brynja, nú förum við Vatnsdalinn..haha. Þar var örugglega öll rigning heimsins á sama staðnum því við sáum ekki nema svona hálfan km fram fyrir okkur og svo var bara veggur. En það sem við sáum þarna var fallegt engu að síður. Skoðuðum Kattaraugað, stoppuðum í bústað hjá Dóru og Palla en þau voru ekki heima og við pissuðum næstum því á okkur. Náðum nú samt að halda í okkur þangað til út á þjóðveg og komum við í kömrunum þar og létum allt gossa!!! hehe. Þegar við komum heim fengum við okkur bjór og skemmtum okkur konunglega á balli á Síróp, eftirpartý og allur pakkinn tekin á þetta þessa helgina!!! Takk Guðrún fyrir frábæra helgi.

FRÍIÐ ER BARA EKKI NÓGU LANGT

Já sæll ég hef ekki bloggað í frekar langan tíma...en ég vil bara kenna einhverju mjög gáfulegu eins og leikriti, prófum, undirbúning jólanna og einhverju um það. Og hörbalæf líka já..hehe. En allavega, nú eru allar sýningar afstaðnar á leikritinu fræga og þetta gekk allt saman alveg sérdeilis prýðilega. Prófin voru öll létt og pís off keik og ég fékk 10, 9, 9 og 7, sem er ekki slæmt á mínum mælikvarða allavega. Jólin komu og fóru án þess að ég eiginlega tæki eftir þeim, og áramótin líka. Þetta voru eitthvað skrítin jól, ég veit ekki af hverju en þau voru eitthvað öðruvísi en maður á að venjast. En góð voru þau samt og ég fékk fuuuullllt að borða og svaf alveg helling. Ég er búin að vera alveg hreint bandóð, já eiginlega er réttast að segja það, með prjónana og er búin að prjóna alveg heilan helling af flíkum og drasli í desember. Núna í augjeblikket er ég að prjóna peysu, bleika og fallega peysu. Ég er meira að segja búin að vera að taka við pöntunum eftir að ég prjónaði eina forláta húfu handa Emm af því að ég vissi ekki hvað ég ætti að gefa henni í afmælisgjöf. Datt í hug að prjóna eitthvað fljótlegt handa henni og það endaði víst með því að það var farið að bjóða í húfuna í afmælinu.... þannig að ég tók bara við pöntun á staðnum..hehe, gaman að því. Nú er víst hversdagsleikinn tekinn við og ég segi ekki „sem betur fer“ eins og svo margir af því að ég vildi að jólin og frítíminn tengdur þeim væri svona helmingi lengri... ef ekki þrefaldur bara. Ég skil ekkert í þessu fólki sem finnst gott þegar fríin eru búin....algjörir plebbar..hehe. En jæja, best að halda áfram að prjóna svo ég geti byrjað á næstu pöntun.

BLE

ALVEG RÓLEGUR KALLINN!!!!

Já, það er nú margt skrýtið í kýrhausnum. Ég var að skoða bækling áðan og rakst þar á jólatré með USB tengi!!!! Til hvers það er veit ég ekki en mér datt í hug hvort maður gæti sem sagt bara tengt jólatréið við tölvuna og dundað sér svo við að skreyta tréð á skjánum og þá myndi skrautið bara birtast á trénu!!!! Það væri auðvitað mun ódýrara, þ.e.a.s. skrautið, og svo gæti maður bara skipt um skraut ef maður yrði leiður á því á annan í jólum... og svo þegar áramótin koma þá setur maður svona áramótalúkk á tréið!! Mér líst vel á þetta, nema hvað að tréið er HVÍTT, og það eitt heldur mér frá því að kaupa mér svona tæknilegt jólatré. Og svo til að toppa þetta allt saman þá hlýtur að vera hægt að láta jólatréð spila jólalögin sem henta hverju sinni..... og kannski er bara hægt að láta það snúast líka, svona fyrir þá sem vilja dansa í kringum jólatréð...þá þurfa þeir ekki að hreyfa sig, heldur dansar jólatréið bara sjálft inni í hringnum.....
Og svo er það Herbalifið!!!!! Hvað er nú eiginlega málið með það?? Er þetta ekki að verða komið svolítið mikið út í öfgar? Ok, ég nota Herbalife stundum, þ.e.a.s. sheikinn og trefjatöflur. Í sheiknum er góð næring og JÁ það er sykur í honum þó svo að þetta sé HOLLASTI morgunverður í öllum heiminum og þó víðar væri leitað...segja sölumennirnir.... Trefjatöflurnar tek ég sökum þess að það þurfa allir trefjar og ekki er ég dugleg í grænmetinu!! Allavega, það er hægt að fá 15-20 mismunandi töflur í þessari Herbalife línu. Þú getur ekki sofnað á kvöldin og þá bara tekuru náttúrulega róandi herbalifetöflu og sofnar eins og steinn bara hviss búmm bang. Svo ef þú átt erfitt með að vakna á morgnana og ert allur/öll í fokki á morgnana þá bara skelliru í þig einni, eða tveimur...eða fleiri, hver veit, áður en þú ferð að sofa á kvöldin og þá bara ertu tjatjíííng... morguninn eftir. Ég spyr nú bara að einu. Náttúrulega róandi Herbalife taflan sem þú tókst fyrst af því að þú átt erfitt með að sofna, hvernig vinnur hún með örvandi töflunni sem á að hjálpa þér að vakna á morgnana, yfir nóttina? Eru þær bara best friends for ever eða?? Og já, svo geturu fengið töflur fyrir ALLA mögulega kvilla, meira að segja ófrjósemi.... ég ætti kannski að segja Art Medica læknunum sem gengu í skóla í milljón ár að þeir fari að missa starfið af því að það eru til töflur sem LÆKNA ófrjósemi. DJÖFULSINS BULL allt saman. Jújú, kannski hjálpa þessar pillur einhverjum eitthvað en fær líkaminn ekki að gera NEITT sjálfur eða??? Þetta kalla ég nú bara einfaldlega að taka all svakalega fram fyrir hendurnar á einhverjum... og þá ég við líkamann í þessu tilfellli. En þetta eru  nú bara mínar hugleiðingar.....

Veriði sæl

GETUR EINHVER RÁÐIÐ Í DRAUMINN?????

Í nótt dreymdi mig að ég var að spjalla við Dorrit Moussaieff á MSN. Í byrjun draumsins var hún reyndar hestur sem ég bannaði að koma inn í hús þar sem fólk hélt til í mjög miklu frosti og þurfti að hafa mikið fyrir því að halda hitanum inni..
Í þessu sama húsi og í sama frosti var Alma pottalimur stödd með tölvuna sína. Eftir að ég var búin að henda Dorrit út í hestlíki.. þá fékk ég tölvuna hennar Ölmu lánaða og signaði mig inn á MSN. Eftir augnablik var Dorrit farin að skamma mig (á MSN) fyrir að hafa hent sér út úr húsinu, henni hafi nú líka verið kalt. Ég sagði henni að hún væri velkomin til okkar, en ekki sem hestur. HEHE.. hvaða bull er þetta???? Svo skemmdist tölvan hennar Ölmu vegna frosts og hún kenndi mér um það af því að ég fékk hana lánaða í 1 mínútu og á átti ég að endurgreiða henni tölvuna að fullu UNDIR EINS.

Jæja, er einhver sem treystir sér í að ráða í þennan furðulega draum minn?? Kannski leynist lausn á kreppuvandamálinu þarna einhversstaðar.........

MJÖG SVO SEXY UNDIRFÖT...HEHE

Okey... nú er ég ALVEG brjáluð. Var búin að skrifa helling og setja inn fullt af myndum.....aaaaaaaarrrrrrrrrrggggggg....... djöfull er pirrandi þegar það dettur bara út eins og ekkert sé.

Jæja ég byrja þá bara aftur.

Núna er frumsýningin búin á leikritinu Jón og Hólmfríður og ef að ÞÚ, lesandi góður komst ekki þá ertu plebbi...hehe, nei nei, ekki er öll von úti enn. Það verður önnur sýning á morgun klukkan nákvæmlega 20:30 að staðartíma. Ég ætla að henda inn nokkrum myndum af þessum afburðarleikurum, þar með talinni mér sjálfri, mjög léttklæddri.... enjoy!

Þetta er ALLUR hópurinn sem kom að leikritinu

Þarna sjáum við leikarana, f.v. Jóhannes, Guðbjörg, Ég, Gísli og Tóti.

Þarna er EGGERT (Tóti) að reyna að telja mig á að vera með honum, ekki Jóni pabba hans(Gísla)

Já gott fólk, svona leit fyrri hálfleikur út að einhverju leyti en tölvan er með einhver leiðindi þannig að ég get ekki sett myndir frá seinni hálfleik akkúrat núna... þið verðið bara að bíða spennt, og glennt eftir þeim. Reyni að setja þær inn næst.

Annars er bara brjálað að gera hjá manni, maður er á fullu í náminu, fólk er alltaf að halda veislur og auðvitað er okkur alltaf boðið þar sem við erum svo skemmtilegt fólk. Í dag eru 3 vikur, eða nánar til tekið 21 dagur síðan ég hætti að soga að mér eitur!!! Já Brynja, til hamingju með það, þú ert svo dugleg!!!!

Jæja nú nenni ég ekki meir... veriði sæl

RÉTT INNIHALDSLÝSING???????

Æi maður, shitt hvað ég hef ekkert að segja. Ekki nema þá bara það að leiksýningin mun eiga sér stað eftir nákvæmlega 41 klukkutíma og 30 mínútur... og JESSÚS hvað ég er orðin stressuð. Enda var ein ónefnd ung stúlkukind sem sagði við mig að hún hafi ALDREI séð mig svona. Þá átti hún við að aðalinnihaldsefnin væru pirringur, svartsýni, stress, reiði, hungur, svefnleysi og spenna allt í bland.  Þó að það séu engin MSG efni í þessari upptalningu var þetta samt einn erfiðasti dagur sem ég hef upplifað í langan tíma og ég vona að þessi innihaldslýsing muni ekki standa utan á mér í náinni framtíð.. og ekki heldur fjarlægri framtíð. Hitaeiningarnar voru ekki margar heldur þar sem innihaldslýsingin gaf til kynna mikið hungur og reiði, og eins og allir vita getur reiði sogið úr manni orkuna endalaust og ef maður missir orku þá þarfnast maður hitaeininga til að byggja upp orkuna aftur og þá er þetta komið í hring og vítahringurinn stækkar og stækkar og allt fer til andskotans. Jæja, óskiði mér nú góðs gengis á laugardaginn og MÆTIÐI... EKKI VERA PLEBBAR! Það kostar ekki nema litlar 2000kr að sá MIG á sviðinu.. hugsiði ykkur, það er nú ekki hátt gjald fyrir að sjá svona glæsilega mannveru á sviði...hehehe

SVIÐAMESSA, KVENMANNSHLÁTUR OG FALSKUR SÖNGUR

Tjeeetjiiiing... Gúten tag pípúl
Við Guðjón fórum á sviðamessu á laugardaginn. Þetta var hin besta skemmtun og maturinn alveg sérdeilis prýðilega góður. Við mættum svona fimmtán mínútum of seint á staðinn þar sem bræðurnir þurftu NAUÐSYNLEGA að taka nokkra leiki í nintendo tölvunni. Þegar við svo komum á staðinn var fullt hús en okkar sæti off korrs laus. Það var strax farið að hitna í kolunum hjá sumum einstaklingum á svæðinu og má þá helst nefna eina konu sem ég veit ekki hvað heitir eða hverra manna er. Hún var allavega í stuði......eiginlega allt of miklu stuði. Hún söng og söng og söng. Það er svo sem ekkert athugavert við að fólki finnist gaman að syngja, en þegar fólk sem finnst gaman að syngja kann ekki að syngja þá fer að versna í því. Fólkið í kringum hana var líka í stuði og þau voru með læti allan tímann og skildu svo ekkert í því af hverju þau heyrðu ekkert í veislustjóranum, og báðu hann um að tala hærra og láta vita hvað lög væri verið að fara að taka svo þau gætu verið með. Veislustjórinn hækkaði í sér en það gerði nú lítið gagn þar sem þetta umrædda fólk hækkaði bara líka í sér og talaði endalaust á meðan veislustjórinn var að tjá sig. Svo heyrði ég konu hlægja.....sem er svosem ekkert óeðlilegt, en ég var búin að heyra hana hlægja svona 10 sinnum og fannst þetta alltaf jafn fyndinn hlátur þegar Benni tilkynnti mér að þetta væri MAÐUR sem væri að hlægja, ekki kona. Og þá var auðvitað ennþá skemmtilegra að heyra greyið mannin hlægja og ég og Gummi hljógum mikið í hvert skipti þegar það gerðist.
Jæja ég held að þetta sé alveg ágætt bara......

VILHJÁLMUR VILHJÁLMSSON

Já, við Guðjón fórum á Minningartónleika Vilhjálms Vilhjálmssonar í boði Nilla og Jónínu um helgina. Þetta var gert til að halda upp á það að Skúli hefði orðið 30 ára Í DAG. Þetta voru alveg æðislegir tónleikar á allan hátt... hefði sko ekki viljað missa af þessu. Við keyptum okkur einn geisladisk á tónleikunum og hlustuðum á hann alla leiðina heim. Mér finnst nýja lagið líka alveg frábært. Svo eyddum við Hafdís allri helginni hjá Katrínu og Erlu. Svo kom herra Guðjón með mér á Akranes þegar tónleikunum lauk, en hann eyddi fyrripart helgarinnar í borg óttans í skólanum....greyið. Mér gengur ágætlega í náminu, fyrir utan helvítis bókfærsluna.... djö..&/(/%$%$)(=.. já ég segi ekki annað, ég er greinilega ekki fædd til að verða bókhaldari... eða hvað sem þetta kallast!!! En hitt gengur vel og ég er að fá 9 og 10 í stærðfræði, fæ ALLTAF fullt hús stiga í Upplýsingatækni, og vélritunin gengur líka mjög vel. Núna sit ég bara í Bakka og er að reyna að læra handritið utanað... já ég er að fara að leika aðalhlutverk í leikriti þann 8. nóvember 2015.... nei djók 8. nóvember nk. En það væri samt ljúft ef þetta væri eftir 7 ár... þá hefði maður næææægan tíma til að læra allan textann. Ég ætla ekkert að tjá mig um kreppuna því ég hef ekki vit á þessu öllu saman, segir sig nokkuð sjálft þegar ég get ekki einu sinni höndlað smá bókfærslu.... ég tjái mig kannski örlítið samt. Ég hef alltaf sagt að það borgar sig ekki að vera of gráðugur eða eiga of mikið af peningum...... þetta er aldeilis komið í ljós.
Jæja, eigiði góðan kreppudag!!!

AUGLÝSINGAR

Og hvernig er það.... er ég sú eina sem finnst VERULEGA asnalegt hvað það er mikið af auglýsingum í sjónvarpinu, og þá á ég við bæði Ríkissjónvarpið, sem við erum by the way SKYLDUG til að borga og líka Stöð 2 sem kostar náttúrulega ekki nema svona sirkabát 80 þúsund krónur á ári. Mér finnst alveg eðlilegt að Skjár1 skuli auglýsa mikið enda sjónvarpsstöð sem gengur á auglýsingum, og við þurfum ekkert að borga. Eigum við það ekki skilið að fá að losna við allar þessar auglýsingar þegar við erum búin að borga morðfjár fyrir heilan mánuð af sjónvarpsefni??? Ríkissjónvarpið er svosem ekki eins dýrt og Stöð 2 en kostar samt og svo þarf maður að þola þessar auglýsingar inni í þáttum og ég veit ekki hvað og hvað. Einu sinni, FYRIR LANGA LÖNGU, var BANNAÐ að auglýsa í ríkissjónvarpinu, af því að þetta var ríkissjónvarp sem allir voru skyldugir að borga af.... HVAÐ VARÐ UM ÞAÐ????? Það að auglýsa eigin dagskrá finnst mér í lagi, til að fólk viti nú hvenær hvað er sýnt. En þegar það eru komnar auglýsingar tvisvar sinnum inni í hverjum þætti á Stöð 2 þá finnst mér heldur langt gengið.... og það er DÝRASTA stöðin. Og ef það eru ekki auglýsingar þá eru það endurteknir þættir í 16 skiptið í þessari viku..... Svo finnst mér líka magnað að eina stöðin sem ekki rukkar saklaust fólk um pening er oftast með skemmtilegustu dagskránna!!! Og þá meina ég auðvitað Skjá1. Ég tek það fram að ég er ekki með stöð 2 og mér dytti ekki hug að borga svona marga peninga af mínum skítalaunum á lægst launaða svæði landsins fyrir þetta.Ég fer bara eitthvað annað til að horfa á nágranna á sunnudögum....til mömmu eða eitthvað.  Það er kannski hugmynd.... að fólk borgi bara prósentu af launum í stöð 2 kostnað... svona eins og skatturinn.... þá þyrfti ég nú ekki að borga mikið!!!!